Oekusipost.com Dili – Sentru Integradu ba Jestaun Krize planeia ona atu halo testa ran ba ema nain 25 ne’ebé tula iha bus Maliana foin lalais hodi evita transmisaun lokal iha rai laran.
P ortavóz Sentru Integradu ba Jestaun Krize, dotora Odete da Silva Viegas hateten, maske ema sira ne’e seidauk iha sintomas ba moras virus corona, maibé tenke hasai sira nia ran hodi halo teste atu nune’e bele evita transmisaun lokal.
Nia hatutan, Timoroan nain 3 ne’ebé oras ne’e pozitivu kona virus corona antes ne’e sa’e hamutuk kareta travel ida husi Kupang mai to’o Batugade. Iha kareta travel ne’e nia laran sira hamutuk nain 8, no mai to’o Batugade sira sa’e tan kareta bus Maliana mai Dili. Iha bus nia laran ne’e iha ema hamutuk nain 25.
“Ita hakarak katak atu limita númeru transmisaun, tanba ne’e mak serbisu ekipa ida ne’ebé mak vizilansia dadauk ne’e halo atu bele hatene ona katak karik ema ne’e mak iha kontaktu duni ho ida pozitivu ne’e ita tenke foti kedas sira nia amostra,” hateten dotora Odata liu husi konferensia ba imprensa iha Sentru Konvensaun Dili, Segunda 13 Abril 2020.
Total dadus ohin loron hatudu, kazu suspeita hamutuk nain 168, provavél hamutuk nain 53, kazu negativu hamutuk nai n 111, kazu pozitivu hamutuk nain 4, no rekoopera nain ida mak sidadaun estranjeiru ne’ebé oras ne’e kontinua hala’o auto-kuarentena iha nia uma iha Dili.
