DILI (TOP) – Bankada CNRT iha Parlamentu Nasionál (PN) lamenta no rejeita akuzasaun husi bankada Partidu Libertasaun Popular (PLP) kona-ba esforsu CNRT tenta blokeia OJE 2021.
Notisia relevante: PLP akuza CNRT tenta blokeia OJE 2021.
Prezidente Bankada CNRT, deputadu Duarte Nunes klarifika situasaun balun, liu-liu kona-ba alegasaun husi Bankada Governu de Faktu, Fretilin, PLP no KHUNTO nian relasiona ho Fiskalizasaun Abstrata ba Orsamentu Jerál Estadu 2021, ne’ebé Bankada CNRT submete ba Tribunal Rekursu.
“Bankada CNRT halo pedidu Fiskalizasaun Abstrata ba Orsamentu Jerál Estadu 2021 tanba artigu 150, alínea (e) husi Konstituisaun-da-Repúblika maka fó dalan,” hateten deputadu Duarte Nunes liu husi konferénsia ba imprensa iha salaun bankada CNRT iha Parlamentu Nasionál, Dili, Tersa 19 Janeiru 2021.
“Bankada CNRT laiha intensaun atu blokeia funsionamentu Governu de Faktu nian ka Impede OJE 2021, maibé Bankada CNRT konsidera OJE 2021 viola regra Konstitusionais no Lei Orsamentu e Jestaun Finanseira. Tanba ne’e maka Bankada CNRT halo pedidu fiskalizasaun abstrata ba OJE 2021,” nia afirma.
Nia hatutan, bankada CNRT la-partisipa iha diskusaun espesialidade ba OJE 2021 la-signifika katak Bankada CNRT labele halo fiskalizasaun abstrata ba OJE 2021. Bankada CNRT iha obrigasaun atu asegura katak Lei Orsamentu Jerál Estadu tenke iha konformidade ba Konstituisaun no Lei Orsamentu e Jestaun Finanseira.
“Bankada CNRT submete Fiskalizasaun Abstrata ba OJE 2021 la’ós tanba dezespera ba ukun, maibé Bankada CNRT defende Konstitusionalidade no Legalidade OJE 2021 nian. Relatóriu Komisaun A no Komisaun C mós mensiona katak OJE 2021 iha violasaun hasoru Konstituisaun no Lei valor reforsadu sira”.
Deputadu husi Ponta Leste, deklarasaun Bankada Governu de Faktu ne’e reflete katak afinál das contas durante ne’e Bankada FRETILIN halo fiskalizasaun abstrata ba OJE 2008, 2009, 2010, 2011, 2018, no 2019 tanba Bankada FRETILIN dezespera ba ukun.
Deputadu husi aldeia Iralafai suku Bauro, postu Lospalos ne’e katak, bankada CNRT dezmente alegasaun katak durante kaer pasta nu’udár Primeiru Ministru, Maun Bot Kay Rala Xanana Gusmão obriga Parlamentu Nasionál ajenda sesaun estraordinária ho plenária taka odamatan hodi impoin aprovasaun ba rezolusaun hodi duni sai majistradu na’in 40 husi Portugal.
“Plenária estraordinária ne’ebé Bankada Governu de Faktu mensiona ne’e kabe ba kompeténsia Prezidente Parlamentu Nasionál nian, iha altura ne’ebé lidera husi Prezidente Fernando Lasama Araujo. Plenária taka odamatan ne’e halo tanba debate kona-ba interese nasionál, ne’ebé Bankada FRETILIN rasik mós aprova no involve iha debate ida ne’e, inklui fó votu Afavor ba rezolusaun ne’ebé espulsa majistradu sira”.
Entretantu, Tribunal Rekursu to’o oras ne’e seidauk fó sai desijaun kona-ba pedidu fiskalizasaun abstratu husi CNRT ba OJE 2021 ne’e inkonstitusional ka konstitusional.
