DILI (TOP) – Bankada FRETILIN iha Parlamentu Nasionál ne’ebé sai ai-tonka governu atual garante osan mina no gas (Fundu Petroleu) ne’ebé deposita hela iha Banku Federál iha New York, Estadus Unidus Amerika sei mai hela, no sei mai bebeik, tanba osan ne’e Estadu Timor-Leste nian, la’os ema ida nian.
Antes ne’e iha loron Sábadu 12 Setembru liuba, líder karismatiku Kay Rala Xanana Gusmão rekoñese Timor-Leste la’os laiha osan, maibé osan iha hela ne’ebé deposita hela iha Banku Federál New York, Estadus Unidus Amerika.
Xanana esplika, OJE 2020 bele liu iha Parlamentu Nasionál, no dala atu asesu ba foti osan iha banku federal ne’e maka problemátiku.
Kona-ba kestaun ne’e, Vise Prezidente Bankada FRETILIN, deputadu Francisco Miranda Branco molok hato’o deklarasaun politika bankada FRETILIN iha sesaun debate jeneralidade OJE 2020 nian, Branco aproveita oportunidade ne’e hodi esklarese ba povu tomak atu labele fiar ba propaganda baratu, ba polítika fahe esmola no kari rai-rahun, ne’ebé ema balun halekar iha povu nia leet, katak Orsamentu Jerál Estadu bele aprova maibé Banku Federál Amérika sei la haruka osan mai Timor.
“Plataforma entendimentu sei aprova duni OGE 2020, no osan Fundu-Minarai iha Banku Federál Amerika mai daudaun hela, no sei mai nafatin, tanba osan ne’e Estadu Timor-Leste nian, la’ós ema ida ka grupu no família ida nian,” hateten deputadu Branco liu husi deklarasaun bankada FRETILIN nian iha Parlamentu Nasionál, Sesta 2 Outubru 2020.
“Bankada FRETILIN apela ba povu tomak, atu labele monu ba manobra foer sira-ne’e, akompaña nafatin polítika iha rai-laran, nune’e tulun mós VIII Governu implementa programa sira ne’ebé sei lori bem estar no moris foun ba ita hotu,” Branco afirma.
Tanba ne’e, deputadu Branco dehan OJE tenke benefísia duni povu tomak, la’ós atu benefísia de’it ba elite ka grupu ki’ik-oan ida ho sira-nia interese, maibé bele hadia kualidade moris povu tomak nian, no hasa’e povu nia produtividade, hatuur hikas Maubere iha sentru ba polítika dezenvolvimentu iha rai laran.
