DILI (TOP) – Eis Prezidente Parlamentu Nasionál, Arão Noe de Jesus da Costa Amaral, dúvida ho Estadu emerjénsia besik atu hotu derepente iha fali kazu positivu ida tan.
"Ha'u haree sempre akontese kuandu besik estadu emerjénsia remata ona iha tan kazu positivu ida, liuhusi ne'e mak halo ha'u dúvida ba Estadu emerjénsia. Ba proposta fali foun mosu moras ida, liu tiha semana ida lakon tiha moras ne'e laiha ona, depois karik Estadu emerjénsia besik atu termina mosu fali moras Covid-19 ida," lamenta Arão ba jornalista sira iha Parlamentu Nasionál Dili, Kinta 01 Outubru 2020.
Nia fundamenta, durante estadu emerjénsia ba daneen ona, nota katak implikasaun estadu emerjénsia ne'e, nune'e hela de’it.
"Ha'u nia haree buat ne'e regula tiha kedas ona loos duni ka la’e, ne'e maka hamosu hela dúvidas tanba la'os dala ida de’it, dala tolu ka dala haat lori maneira ida ne'e," nia kestiona.
Nia esplika, iha parte positivu laiha parte ida, haree mós kona-ba prevene ema husi liur tama mai Timor-Leste, hodi nune'e para labele alastra Covid-19 iha Timor laran.
"Tanba ne'e, maka ha'u nia hanoin assaun ida di’ak para oinsa bele prevene tanba ita seidauk iha lejislasaun ida para atu hodi kontrola atu limita ema nia sirkulasaun entaun só estadu emerjénsia maka bele halo, enkuantu laiha baze legal seluk kontinua Estadu ida ne'e hodi prevene," nia dehan.
Arão katak, tuir loloos ne'e bele rezolve kestaun sira ne'e, ho lei sira seluk, lei ida ne'ebé Prezidente Repúblika veta tiha husik de’it iha meza parlamentu hodi haree fali ida ne'e fó kompetensia ba autoridade sira atu kontrola de’it la presiza rezolve liu husi Estadu emerjénsia.
“Tanba sa maka ita la haree ba baze legal sira seluk, dalan úniku maka tenke halo Estadu emerjénsia maibé, ho limitasaun de’it fronteira sira iha rai laran bele sirkulasaun laiha impaktu, atu fó impaktu maka balun desloka ba liur no tama mai ita iha laran buat hotu di’ak”.
Entretantu, governu iha ona planu atu extende tan Estadu emerjénsia ba fulan ida tan hafoin deteta sidadaun Indonézia ida positivu moras Covid-19 bainhira tama mai Timor-Leste.
