Meja PN fó han bosu tiha, fila baku rahun fali

DILI (TOP) – Durante ne'e mosu laloran boot tebes hanesan akontesimentu mosu iha Parlamento Nasionál ne’ebé halo deputadu no deputada sira haksesuk malu, no raut malu iha sala plenária hodi halo meja Parlamentu Nasioná ne’ebé durante ne’e fó sira to’o bosu didi’ak, fila baku rahun tiha fali, tanba de’it hadau malu poder.

Preokupasaun sira ne'e mak estudante sira husi Universidade Nasionál Timor-Lorosa'e (UNTL) hala'o semináriu durante oras lima nia laran, hamutuk ho orador na'in rua hanesan jurista Avellino Coelho, no Diretor Ezekutivu Peace Center, Antero Benedito da Silva.

Akademista Antero Benedito da Silva katak, situasaun real ne’ebé akontese iha Parlamentu Nasionál, deputadu sira haksesuk malu namanas hela, no balun konsege baku rahun tiha meja Parlamentu Nasionál, maibé sira haluha tiha katak, meja ne'e mak fó han sira bosu ona, to'o ikus sira mak baku rahun tiha fali, no tuir akademista ne’e katak akontesimentu ne’e halo ema hotu durante ne’e sente preokupa tebes.

"Tuir ita hotu nia haree durante ne'e akontese iha Parlamentu Nasionál, meza Parlamentu fó han sira to'o bosu, to'o ikus fila ba meja baku rahun tiha, ida ne'e mak sai motivasaun di'ak ida ba ita jerasaun foun, atu nune'e iha futuru labele akontese tan hanesan ita nia ukun-na'in sira," hateten Antero ba jornalista sira iha salaun Fakuldade Siensia Sosiais Kampus UNTL Kaikoli, Dili, Sesta 14 Agostu 2020.

Nia hatutan, tema jeral ne'ebé ohin relata ona, katak konsolidasaun Demokrásia Paz Estabilidade no Dezenvolvimento Nasionál, maibé iha ohin loron ema hotu kestiona ho situasaun real ne'ebé mosu iha rai-laran, liliu paz no estabilidade ba ukun na'in sira.

“Dalaruma sira hadau malu de'it ba ida-idak nia poder, maibé haluhan tiha povu ai-leba sira nia terus, no susar iha área izoladu sira hotu iha rai-laran, kuandu to'o tempu ne'ebé ukun na'in sira tun iha terrenu atu halo kampaña, sira promete buat barak ba povu ai-leba, maibé to'o ikus sira haluhan tiha saída mak sira promete ona ba povu,” nia afirma.

Jurista Avelino Coelho. Foto The Oe-Kusi Post/Jefriano Oqui

Iha fatin hanesan Jurista Avellino Coelho hatutan hodi konsidera povu ai-leba sira lahatene lee no hakerek, maibé sira hatene sura no ko'alia, nune'e bainhira sira fó sira-nia votu ba ema ne'ebé kandidata aan ba partidu politika ida hodi sai membru governu, to'o ikus labele haluha povu nia votu ne'e.

"Ita nia avó sira iha foho lahatene hakerek no lee, maibé sira hatene ko'alia no sura, nia bele transmite buat ne'ebé furak iha ema barak nia-oin liu husi pensamentu ne'ebé nia iha, ida ne'e ita konsidera sira ne'e intelektual ka la’e, ho ida ne'e mak ita tenke haree didi’ak, tanba dalaruma povu matenek liu fali ita,” Avellino esplika.