DILI (TOP) – Xefe Estadu-Maijor Jeneral das FAILINTIL F-FDTL, Lere Anan Timur hatan ona karta husi eis komandante em xefe das FALINTIL, Kay Rala Xanana Gusmão katak, nia la’os fundador FRETILIN no fundador FALINTIL, maibé nu’udar mós nasaun ida ne’e.
"Ami la’os fundador FRETILIN ka FALINTIL, maibé nasaun ida ne’e, ami mós funda. Ami haree situasaun politika iha rai-laran husi governu ne’ebé deit ha’u sente la satizfeitu. Ami haruka surat ba lider istóriku sira hotu atu sira bele tetu bele dasin pelu menus altera situasaun ida ne’e, sai diak ba nasaun no jerasaun futuru,” hateten Maijen Lere ba jornalista sira iha Palásiu Governu Sesta 12 Juñu 2020.
“Ha’u hanoin karta haruka husi Maun bo’ot Xanana, la’os haruka mai ba ha’u de’it maibé haruka ba ha’u e m nome Forsa Defeza Timor-Leste (FDTL). Liu-liu ofisial Jeneral, ami la’os hato’o ba Maun boot Xanana deit, maibé lider beteranu sira hotu, atu hato’o ami nia preokupasaun, ami nia sentimentu ne’ebé ami mós funda nasaun ida ne’e,” nia hatutan.
Nia hatutan, ohin iha reuniaun, sira dehan karta haruka ona ba kuartel jeral maibé surat ne’e liuhusi fali media, ha’u mós hatene ona maibé maun boot la responde tuir ami nia sentimentu. Maibé ha’u hanoin katak nudar ha’u nia maun, ami sei hasoru malu, loron ida mak hau sei buka tempu atu hasoru malu ho ha’u nia maun hanesan lider ida.
“Sentimentu ne’e, ita hotu-hotu haree Timoroan ne’e, ita ko’alia bebeik, dalaruma konseitu hotu-hotu baruk rona ona, ita harii nasaun ida ne’e, ran ho ruin ita sei iha lider sira ne’ebé mak faluk oan kiak no beteranu sira ne’ebé mak oinsa sira lahatene,” nia hotu.
Entretantu, antes ne’e eis komandante em xefe das FALINTIL, Kay Rala Xanana Gusmão hatan ba karta Maijen Lere nian katak, nia (Xanana) la komprende konteudu husi karta Maijen Lere.
Notisia relevante: Xanana atan oan ha’u ne’e se
