DILI (TOP) – Subsidiu osan dolar amerikanu atus ida ($100) ba uma kain sira ne’ebé rendimentu menus husi dolar amerikanu atus lima ($500), la’ós sidadaun sira iha rai-laran mak ezije no husu, maibé governu rasik mak promete no promete hela de’it hodi loron-kalan mak husu ba sidadaun sira dehan hein lai, hein lai no kontinua hein lai.
Planu atu fó subsidiu $100 ba kada uma kain sira ne’ebé rendimentu menus husi $500 aprezenta husi Ministru Koordenador ba assuntu Ekonómiku, Fidelis Manuel Leite Magalhães iha reuniaun Konsellu Ministru sira iha loron Kuarta 8 Abril 2020. Husi ne’e kedas, to’o ohin loron seidauk tama ba iha implementasaun.
Antes ne’e, governu kontinua promete hodi fó ultimatum atu hahu fahe ona subsidiu osan ne’e iha loron 15 Maiu liuba, ida ne’e la akontese. Sidadaun sira kontinua hein, no hein to’o ohin loron. Depois falla iha ne’e, dehan sei fahe fali iha loron 25 Maiu foin lalais, ida ne’e mós la akontese ona.
Governu lalais loos halo estensaun ba Estadu emerjénsia, no oras ne’e tama ona ba dala tolu, infelizmente promesa governu nian to’o oras ne’e seidauk realiza hela de’it.
Notisia relevante: Estadu emerjénsia datolu sei remata iha 26 Juñu
Durante ne’e ki’ak ho ki’ak no maluk ho maluk mak tulun malu, no governu loron ba loron mak promete hela de'it.
Maske nune’e, Primeiru-Ministru, Taur Matan Ruak kontinua halo promesa ba sidadaun sira, governu sei implementa subsidiu ne’e ho rajaun governu rasik mak promete ona.
PM Matan Ruak, esplika seidauk bele implementa promesa ne’e, tanba durante ne’e nia liman-ain sira hasoru hela difikuldade iha difikuldade téknika dadus prosesual iha administrativa kona-ba lei no medidas legal sira.
"Ha'u hakarak hateten medidas sira ne’e governu sei implementa tanba ne’e promete ona no iha ona planu sei implemeta, populasaun labele hein banhira mak $100 mai, kuandu lahatene derepente to’o de’it mai, osan iha tiha ona," nia hateten ba jornalista sira iha Parlamentu Nasionál, Dili Kuarta 27 Maiu 2020.
