MALELAT (TOP) – Eis Komandante em Chefe das FALINTIL, Kay Rala Xanana Gusmão hamutuk ho komunidade sira iha suku Malelat, postu Passabe, Oe-Kusi Ambeno tinan ida ne’e komemora loron moris Forsa Armada Libertasaun Nasionál Timor-Leste (FALINTIL) ba dala 45.
Istorikamente, FALINTIL harii iha loron 20 Agostu 1975, no kompleta ona tinan 45 iha loron 20 Agostu 2020.
Molok sosializa prevensaun Covid-19 no halo asaun karitativa, Kay Rala Xanana Gusmão bolu membru F-FDTL sira ne’ebé destakadu iha Oe-Kusi Ambeno ba hamrik hamutuk iha komunidade Malelat nia oin mak Xanana haruka komunidade sira basa liman ba sira nu’udar simbolu komemora no festeza loron FALINTIL nian. 
“Lori komunidade ne’ebé ho simples tebes ba ofisiais militar F-FDTL ne’ebé serbisu iha Oe-Kusi Ambeno mak ida nee, ita basa liman ba sira. Obrigadu, husu boot serbisu di’ak hodi servi nafatin povu ida ne’e,” Xanana komemora loron FALINTIL ba dala 45 iha suku Malelat, postu Passabe, Oe-Kusi Ambeno, Kinta 20 Agostu 2020.
