OEL-UPUN – Durante ne’e ema barak sempre kestiona kapasidade empreza lokal sira iha rai-laran halo projetu sira la tuir durasaun kontratu, no sempre demora hela de’it, maibé empreza lokal ida iha Rejiaun Administrativu Oe-Kusi Ambeno (RAEOA) ho naran Am Lhichoe Unipesoal Lda lori de’it loron 30 nia laran konsege finaliza ona projetu bee moos ida iha Oel-Upun (Oe-Upu) maske durasaun kontratu ne’e ba loron 60.
Ho susesu ne’e, Prezidente Autoridade ba RAEOA, Arsenio Paixão Bano halo ona inagurasaun ba projetu bee moos ne’e iha loron Sesta, 3 Jullu 2020.
Konstrusaun ba projetu ne’e nudar programa emerjensia husi Prezidente Autoridade uluk nian, José Luis Guterres ‘Lugu’. Iha tempu ne’eba, Lugu konvida kompañia 3 mak konkore ba projetu ne’e ho nia objetivu atu fó tulun urjente ba ema sira ne’ebé hela iha fatin akolimentu (kuarentena) Hotel Oel-Upun, no tulun mós komunidade sira ho total uma kain 105 iha bairu ne’e. No, ikus mai manan nain ba projetu ne’e husi kompañia Am Lhichoe Unipesoal Lda ho nia nain mak Eurico Darosa.
Obra ne’e lokaliza iha hotel Oel-Upun nia kotuk, rabat loos ho foho Lifau partensia ba aldeia Sanane, suku Costa, Postu Pante Macassar, Oe-Kusi Ambeno.
Projetu ne’e ho naran captação e ditribuição de agua no hotel Oel-Upun e areadores, no quadro execução da declaração do Estado de emergencia nacionál na RAEOA-ZEESM-TL. Projetu ne’e ho nia númeru kontratu mak 19/2020/PA/RAEOA-ZEESM TL ho total orsamentu $22,624.15 ba durasaun loron 60, maibé kompañia lori de’it loron 30 konsege finaliza tiha.
“Ohin ha’u mai inagura bee moos ne’e atu responde emerjensia futuru Hotel Oel-Upun, maibé alen de ida ne’e mós sei fornese ba komunidade 105 iha bairo ne’e,” hateten Prezidente Autoridade ba RAEOA, Arsenio Paixão hafoin inagura projetu bee moos ne’e iha loron Sesta 3 Jullu 2020 iha Oe-Upun, Oe-Kusi Ambeno.
Bano hatutan, nia sente kontente tebes ho razaun simples de’it, tanba iha kontratu ne’e durasaun loron 60 tenke remata, maibé ho esforsu maka’as husi kompañia lori loron 30 de’it remata ona. Nune’e, Bano husu ba komunidade sira atu tau matan didi’ak ba bee moos ne’e hodi bele fó benefisiu ba sira rasik, no mós bele fornese tan ba komunidade sira seluk ne’ebé presija tebes bee moos ne’e.
“Kompañia Am Lhichoe halo ho kualidade, diretór Obras Públika hamutuk ho diresaun DNSAS halo sevisu di’ak, komunidade mós apoiu, ne’ebé ida ne’e susesu di’ak ba Oe-Kusi Ambeno,” Bano orgullu.
Bano mós agradese ba eis Prezidente Autoridade RAEOA, Lugu nia esforsu hodi fó tulun ona komunidade iha situasaun emerjensia liuba.
“Projetu ne’e programa husi Prezidente sesante agora halo tiha ona, ita agradese. ba kompañia Am Lhichoe ho obras públiku hamutuk ho nia ekipa diresaun DNSAS, tanba sira serbisu maka’as iha tempu Estadu emerjénsia ita mós fó agradese”.
Iha fatin hanesan, Diretór Obras Públika RAEOA, Kandido dos Reis Amaral konta sai istoria naruk tebes kona-ba lala’ok prosesu tenderizasaun ba projetu ne’e, tanba halo iha situasaun Estadu emerjénsia nia laran.
Nia dehan, iha mumentu ne’eba ema barak mai husi nasaun viziñu tama mai Oe-Kusi Ambeno hahu tama hela iha fatin akolimentu hotel Oel-Upun susar tebes inklui komunidade sira iha fatin ne’eba atu asesu ba bee mos
“Nia prosesu hahu ami konvida kompañia 3, ne’ebé hatama sira nia submisaun dokumentu, no presu ikus mai liu husi ekipa verifika deside katak kompañia Am Lhichoe mak sai manan nain ba projetu ne’e, no ho nia kontratu loron 60, maibé sira halo lais liu tanba emerjénsia, ne’e ita agradese ba obra ita hare ho matan kualidade tebes,” Kandido apresia empreza Am Lhichoe.
Entretantu, diretór kompañia Am Lhichoe Unipesoal Lda, Eurico Darosa esplika, téknikamente projetu foun ba bee mos ne’e katak, projetu ne’e nia item serbisu mak monta bomba foun ho marka Groundfos modelu SP14-13, ho nia kapsidade 4,8 litru per second.
Nia hatutan, obra bee moos ne’e nia transmisaun iha rua, ida ba tanki komunidade nian, no ida seluk tama direita ba iha área hotel Oel-Upun. Transmisaun tama iha area hotel Oel-Upun iha metru 800, no uza Pipe High Density Polyethylene (HDPE) ho nia medida HDPE mak 63, no medida HDPE 50 ne’e iha metru 300. HDPE 32 iha metru 200, no HDPE 20 iha metru 100. Ne’ebé total pipeline ne’ebé mak ezekuta iha obra ne’e mak metru 1400.
