OE-SONO (TOP) – Rezultadu politika viabiliza ida mak tenke hasai José Luis Guterres husi Oe-Kusi Ambeno, no hakarak ka lakohi tenke troka ho ema FRETILIN ida, nia atu husi fatin ne’ebé de’it, maibé tenke ema FRETILIN mak bele ba Oe-Kusi Ambeno ho rajaun simples de’it, tanba projetu pilotu ZEESM ne’e Mari Bin Amude Alkatiri mak hahu implementa programa governasaun Kay Rala Xanana Gusmão nian iha rai-ketan ne’e.
Ho rezultadu politika viabiliza ne’e mak Arsenio Paixão Bano troka duni ona José Luis Guterres ‘Lugu’ ne’ebé antes ne’e dehan nia ba Oe-Kusi Ambeno la’os atu ukun, maibé atu servi.
Kontrariu ho Bano nian hamutuk ho lia-nain sira husi suku 18 iha Oe-Kusi Ambeno simu ona rota (pilu má soit) hodi ukun tan povu Oe-Kusi Ambeno iha tinan lima ba kotuk ho Mari Bin Amude Alkatiri. Prosesu entrega pilu má soit (rota ukun) ne’e hala’o liu husi serimonia ritual ida iha rezidensia (Sonaf) liu-rai Costa iha Oe-Sono, Oe-Kusi Ambeno iha loron Sesta 19 Juñu 2020 oras kalan.
The Oe-Kusi Post (TOP) observa seremonia entrega pilu má soit iha Sonaf (rezidensia) liu-rai Costa ne’e partisipa mós lia-nain sira husi suku Bobomote- nu’udar liu-rai Costa nia aman sira, no Bana-Afi (Banafi) nu’udar inan, inklui mós Seob ho Tasaen no Nai Juf (Dato).
Hafoin seremonia ritual ne’e, Bano hato’o agradese b alia-nain sira husi suku 18.
“Ha’u fó obrigadu ba ha’u nia aman sira husi suku 18, tanba ohin kalan ne’e loke ona dalan ida dalan loloos hanesan mandatu formal,” hateten Bano iha Oe-Sono, Oe-Kusi Ambeno Sesta 19 Juñu 2020.
“Husi Oe-Kusi atu kontinua serbisu ne’ebé mak Prezidenti sira uluk hala’o tiha ona ne’e. Ba ha’u la’os atu kontenti, maibé ne’e ba ha’u hanesan fiar ida labele husik monu hanesan ne’e de’it, ha’u nia forsa, ha’u hanoin mak ha’u nia aman sira iha suku 18. Forsa mak iha povu no rai Oe-Kusi”.
Iha fatin hanesan, liu-rai Costa, António Hermenegildo da Costa reprezenta povu Oe-Kusi Ambeno agradese ba governu sentral, tanba fó fiar ba Ambeno nia oan hodi mai sai aman ba povu Ambeno
“Ha’u lori lia-nain no aman, maun-alin husi Bobo, Ban-Afi, Seob ho Tasaeb ami senti orgullu tebes. Ami fiar katak ho fiar ne’e bele servi ba Oe-Kusi atu hasai povu husi izolamentu ne’e. Agradese tebes tanba Oe-Kusi nia oan rasik mak mai fali komvida juventude, ferik ho katuas atu fó apoiu, fó liman hamutuk ho hanoin ida de’it katak Oe-Kusi tenki sai referénsia ba Timor-Leste,” nia esplika.
Entretantu, antes ne’e Juventude no komunidade sira balun inklui família afetadu sira ne’ebé to’o oras ne’e seidauk hetan kompensasaun hahu prepara ona kondisaun hodi halo ”asaun” hasoru Arsenio Paixão Bano. Juventude no komunidade sira deklara assuntu ne’e hafoin Primeiru-Ministru, Taur Matan Ruak foti desijaun ezonera tiha José Luis Guterres ‘Lugu’ hodi nomeia fali Arsenio Paixão Bano ba kargu Prezidente Autoridade ba RAEOA ne’ebé durante tinan lima nia laran halo joven barak atu asesu ba serbisu administrasaun públiku mós tenke uja kartaun partidu nian.
Notisia relevante: Juventude Ambeno deklara abertamente sei "revolta" hasoru Arsenio Bano
Joven sira ne’e mós konsidera prezensa Lugu nian iha Oe-Kusi Ambeno maske foin mak halo fulan 7, maibé sira sente kedas ona ukun a’an loloos kompara ho Prezidente Autoridade tuan, Mari Alkatiri ho Arsenio Bano halo sira sente moris iha ditadura nia laran.
Faktu politika hatudu, maske Mari Alkatiri ho Arsenio Bano ukun durante tinan 5 ho osan barak, no konsege dezenvolve suku 5 iha Oe-Kusi Ambeno, maibé eleisaun jeral 2017 no eleisaun antisipada tinan 2018, partidu FRETILIN kontinua lakon iha Oe-Kusi Ambeno.
