DILI (TOP) – Prezidente Autoridade ba Rejiaun Administrativu Espesial Oe-Kusi Ambeno, José Luis Guterres ‘Lugu’ katak nia laiha problema ida liga ba petisaun ne’ebé hatama husi joven nain 7 ba orgaun soberanu sira iha Timor-Leste.
Lugu husu ba sidadaun sira ne’ebé liliu husi Oe-Kusi Ambeno mak hanoin la tuir governante sira, favór hatete, favór kritika.
“Ha’u laiha problema ida para imi aprezenta katak ha’u di’ak liu ida ne’eba. Nia lahatene buat ida, nia hela de’it iha Dili, ha’u laiha problema ida,” Lugu hateten ba jornalista sira iha Ministériu Edukasaun Juventude no Desportu, Vila-Verde, Dili Tersa 09 Juñu 2020.
“Ne’ebé prinsipalmente ba ha’u importante liu mak liberdade espresaun. Ida ne’e ha’u hakarak defende maske liberdade espresaun ne’e mai hasoru buat ne’ebé ha’u hakarak. Laiha problema ida. Ha’u laiha problema ba ida ne’e. Importante liu mak ita halo buat hotu ho onestidade,” Lugu afirma.
Entretantu, antes ne’e iha loron 01 Juñu liuba, deputadu husi bankada FRETILIN, Fabião de Oliveira liu husi sesaun plenaria iha Parlamentu Nasionál ezije ba governu tenke “duni sai” Lugu husi Oe-Kusi Ambeno ho rajaun hela de’it iha Dili, no la kontinua mega projetu sira iha rai-ketan ne’e maske osan seidauk iha.
Notisia relevante: FRETILIN ezije governu tenke troka Lugu
Deputadu FRETILIN ne’e hafoin levanta assuntu ne’e iha dader iha Parlamentu Nasionál, joven nain 7 husi Oe-Kusi Ambeno mós halo kedas konferénsia ba imprensa hodi haforsa de’it assuntu ne’ebé deputadu FRETILIN Fabião levanta iha sesaun plenaria, no mós REINO nian.
Notisia relevante: Juventude FRETILIN Ambeno keixa ona Lugu
Maske nune’e, Lugu konsidera katak bainhira ema sira ne’e lori argumentu sira ne’ebé kleuk, no la loos sei hatun aan rasik.
Lugu dehan, nia depende de’it ba governu, depende ba iha Primeiru-Ministru, Taur Matan Ruak, no dalaruma nia sei ba hasoru Primeiru-Ministru iha semana ida ne’e nia-laran.
Nia hatutan, hafoin simu mandatu husi governu sentral iha Novembru tinan kotuk, to’o oras ne’e felizmente nia vizita ona suku 18 iha Oe-Kusi Ambeno, no mós fahe tiha ona nesesidade báziku ba kbi’it la’ek sira iha rai-ketan ne’e.
