DILI (TOP) – Iha ema nain rua (2) husi partidu FRETILIN mak naran tama iha lista estrutura sekretáriu rejionál ne’ebé sei hatama ba Primeiru-Ministru atu hare no hakotu.
Tuir informasaun balun ne’ebé The Oe-Kusi Post (TOP) asesu, lista kandidatura ba Sekretáriu Rejionál sira prontu ona, no hein de’it atu hatama ba Primeiru-Ministru, Taur Matan Ruak.
Estrutura sekretáriu rejionál tuan hamutuk ema nain 7 (hitu), maibé oras ne’e aumenta tan ema nain rua husi partidu FRETILIN hodi hamutuk nain sia (9).
“Nain hitu ne’e mantein hanesan uluk, aumenta tan 2. Ida ba obras públiku, no ida ba sosial no antigos kombantente,” esplika fonte ida husi gabinete RAEOA-ZEESM ba The Oe-Kusi Post.
Lista estrutura Sekretáriu Rejionál sira iha RAEOA durante tinan lima ba kotuk (2015-2019) mak hanesan, Sekretária Rejionál ba Finansas, Leonia da Costa Monteiro, Sekretáriu Rejionál ba Edukasaun, Sosial no Saúde, Arsenio Paixão Bano, Sekretáriu Rejionál ba Planeamentu Territorial, Pedro de Sousa Xavier, Sekretáriu Rejionál ba Administrasaun, Francisco Xavier Marques, Sekretáriu Rejionál ba Agrikultura no Dezenvolvimentu Rural, Regio da Cruz Salu, Sekretária Rejionál ba Turizmu Komunitaria, Inácia da Conceição Teixeira, no ikus liu mak Sekretária Rejionál ba assuntu Saúde, Lucia Taeki.
Iha parte seluk, lideransa balun husi Partidu Libertasaun Popular (PLP) katak, maske estrutura ne’e kompletu ona, maibé nia sei dúvida hela, tanba bele iha mudansa iha nasionál, maibé nia mós kontente katak kompozisaun estrutura ne’e reprezenta partidu politika sira iha Oe-Kusi Ambeno.
Pozisaun Prezidente Autoridade ba Rejiaun Administrativu Espesial Oe-Kusi Ambeno (RAEOA), no Zona Espesial ba Ekonómia Sosial Merkadu (ZEESM) oras ne’e “nakdoko” itoan, tanba kazu husi rezultadu politiza viabiliza governu atual, maibé Arsenio Paixão Bano katak, nia simu tiha ona orientasaun no lia-fuan murak barak husi Primeiru-Ministru, Taur Matan Ruak.
Notisia relevante: Destinu RAEOA – Bano: ha’u simu ona lia-murak husi PM Taur
