AMBENO (TOP) – Prezidente Autoridade ba Rejiaun Administrativu Espesial Oe-KusiAmbeno (RAEOA), José Luis Guterres “Lugu”tulun ona oan ki’ak sira hamutuk nain 103 iha uma mahon Topu-Honis iha Kua-Tete (Kutet).
Lugu, simbolikamente entrega ona nesesidade bázika ba orfanatu Topu Honis, Kua-Tete hanesan asaun solidaridade husi prezidente autoridade ne’ebé promote ona iha nia vizita dahuluk iha loron 14 Maiu 2020.
Notisia relevante: Lugu promete sei tulun orfonatu nain 103 iha Topu Honis
“Ohin, ha’u mai entrega nesesidade bázika ba ita-nia oan ki’ak sira iha orfanatu Topu Honis. Ami entrega ai-han sira ne’e ba labarik sira hamutuk 103, inklui inan-feto hodi sira bele augenta sira-nia moris loron-loron iha orfanatu ne’e”, hateten Prezidente Autoridade RAEOA ne’ebé públika iha pájina ofisial Facebook Media Gabinete PA Raeoa-ZEESM.
Lugu agradese ba PT Wijaya Karya (Persero), Tbk no PT Pertamina International Timor, SA ne’ebé oferse foos saku 50, supermie 50 no nesesidade báziku sira seluk.
Ho apoiu nesesidade baziku husi Autoridade RAEOA, Orfanatu, Teus Soares (12) sente kontente no dehan “Ha’u agradese ba Prezidente Autoridade tanba hanoin ami hodi apoiu foos. Apoiu ne’e sei ajuda ha’u atu han no estuda di’ak”.
Koordenadóra Orfanatu Topu Honis, Liliana Tarung sente orgullu tanba Prezidente Autoridade diretamente mai iha orfonatu hodi intrega direta nesesidade bázika ne’e.
“Prezidente Autoridade fó nia tempu espesiál hodi lori prezente furak ne’e ba ami. Ha’u ho labarik sira-nia naran hakarak hato’o ami-nia agradese ba Prezidente Autoridade no Maromak de’it mak sei selu nia favór ba ajuda ida-ne’e”, Koordenadora hato’o agradese ho sentimentu kontente iha Kutete, 1 Juñu.
Nia dehan apoiu no vizita bandala-rua ne’e hanesan supreza boot ida ba sira, tanba sira moris iha área remota no vizita espesiál husi entidade altu nivel ne’e seidauk akontese.
“Autoridade RAEOA apoiu foos saku 50, supermi kaixa 50 no nesesidade bázika seluk tan. Ha’u fiar katak ami bele konsume maizomenus fulan haat to’o lima tanba ami akompaña ho ai-han lokál sira seluk”, dehan koordenadora Liliana.
Sasán nesesidade bázika ne’e entrega diretamente husi Embaixadór Indonésia iha Timor-Leste, iha loron 26 Maiu iha eskritóriu ZEESM Dili hodi entrega ba família kbiit la’ek no oan kiak iha RAEOA.
