DILI (TOP) – Rejiaun Administrativu Espesial Oe-Kusi Ambeno (RAEOA) hetan ona tulun nesesidade báziku sira inklui tanki bee ida husi PERTAMINA internasional, SA, hodi fasilita povu Oe-Kusi Ambeno kombate hamlaha no virus corona (Covid-19) durante periodu Estadu emerjénsia.
Prezidenti Autoridade ba RAEOA, José Luis Guterres “Lugu” agradese ba laran luak husi Embaixada Indonézia iha Timor-Leste liu husi PERTAMINA no PITSA ba apoiu nesesidade báziku sira ne’e, no sei lori ba Oe-Kusi Ambeno.
“Ida ne’e di’ak tebes no ami agradese tebes ba iha Embaixada Indonézia no PERTAMINA inklui funsionáriu tomak. Hein katak ho jestu ida ne’e bele kontinua nafatin relasaun nasaun rua ho di’ak,” hateten Lugu ba jornalista sira iha Farol-Dili, Tersa 26 Maiu 2020.
Sasán sira ne’e entrega simbolikamente husi Embaixador Indonézia iha Timor-Leste, Sahat Sitorus no d iretór Ezekutivu PERTAMINA International Timor, SA, Beny Harto Wijaya, ba Prezidente Autoridade RAEOA-ZEESM, José Luís Guterres ‘Lugu’ iha Farol.
Iha fatin hanesan, embaixadór Repúblika Indonézia mai Timor-Leste, Sahat Sitorus katak, apoia ne’e hodi naran nasaun Indonézia nian liuhosi PERTAMINA hodi fahe ba povu Oe-Kusi Ambeno relasiona ho surtu Covid-19.
“Ita hasoru problema Coronavírus, tanba ne’e ita labele servisu no laiha osan hodi sosa sasán. Tanba ne’e, ami hamutuk ho PERTAMINA hakarak fó ajudu nesesidade bázika no tangki bee hodi fase liman tuir regulamentu ne’ebé estabelese ona husi Governu, hodi halo prevensaun ba COVID-19. Agradese mós ba Prezidente Autoridade tanba bele fó ona oportunidade ba ami hodi fahe ksolok ne’e ba povu Oe-Kusi Ambeno,” hateten Sitorus.
Entretantu, ulun boot PERTAMINA International Timor, SA, Beny Harto Wijaya katak, durante ne’e PERTAMINA mós apoiu ona nesesidade báziku balun ba komunidade sira iha área Bebonuk-Dili no fatin sira seluk tan.
“Ami konsidera povu Timor-Leste hanesan ami-nia maluk mós, tanba ne’e ami hakarak fó apoia nesesidade bázika. Ha’u rasik senti kontenti tebes tanba iha Timor-Leste la rejista ona COVID-19, ne’e di’ak tebes.”
Entretantu, nesesidade bázika sira ne’ebé oferese maka hanesan foos, mina ba tein, no sasán seluk tan, inklui tanki bee ida.
