MALELAT (TOP) – Ekipa Gabinete Prezidente Autoridade (PA) ba Rejiaun Administrativu Espesial Oe-Kusi Ambeno (RAEOA) kontinua fahe apoiu umanitáriu ba uma kain kuaje 80 iha Oe-Kusi postu Oe-Silo no Pasabe.
Situasaun Estadu emerjénsia ba daruak iha rai-ketan ne’e la’o ho hakmatek tebes maske problema menus hamlaha hahu ataka dadauk komunidade sira iha Oe-Kusi Ambeno, liliu familia kbi’it la’ek sira, maibé iha semana hirak nia laran autoridade RAEOA hahu ona halo intervensaun liu husi asaun apoiu umanitáriu ba familia kbi’it lae sira.
Iha loron Segunda liuba, ekipa gabinete autoridade kontinua fahe tan nesesida báziku ba uma kain 45 iha suku Usif-Takeno (Uistakeno), no suku Abani inklui Malelat kuaje uma kain 30 resin.
Xefe Gabinete interinu Prezidenti Autoridade RAEOA, Agustinho Caet hateten, Prezidente Autoridade RAEOA, José Luis Guterres “Lugu” orienta ona atu apoiu familia kbi’it sira hotu iha Oe-Kusi Ambeno.
“Tanba ne’e mak ita kontinua hala’o asaun ne’e iha suku barak tuir planu suku 18 sei hetan hotu inklui estudante sira iha Dili mós balu hetan ona ne’e autoridade nia planu. Maske ohin kalan mai to’o iha Malelat suku ida izoladu tebes iha Oe-Kusi Ambeno ho nia populasaun barak mós hasoru difikuladade kona-ba ai-han, tanba tinan ne’e udan been ladun di’ak, depois Estadu emerjénsia mai tan, entaun susar tebes,” hateten Caet ba The Oe-Kusi Post iha Malelat, Oe-Kusi Ambeno, Segunda 11 Maiu 2020.
Nia hatutan, suku Malelat iha potensia boot ba produsaun agrikola, maibé produtu agrikola hirak ne’e labele lori ba merkadu hodi fa’an, tanba primeiru kondisaun estrada mak ladun permite no segundu mak Estadu emerjénsia.
Entretantu, iha fatin hanesan xefe suku Malelat, José Marques agradese ba apoiu umanitáriu husi autoridade RAEOA nian, tanba apoiu ne’e pelu-menus bele ajuda netik ona familia kbi’it la’ek sira durante periodu Estadu emerjénsia ne’e.
Xefe suku Usif-Takeno (Uistakeno), Fransisco Elu mós agradese tebes ba apoiu ne’e.
Suku Usif-Takeno (Uistakeno) partense ba postu Oe-Silo, no suku Abani inklui suku Malelat partense ba postu Pasabe.
Entretantu, antes ne’e serbisu Estatal Oe-Kusi Ambeno rejista ona uma kain hamutuk 19.839 mak oras ne’e hein hela apoiu umanitáriu hanesan nesesidade báziku no subsidiu osan dolar atus ida ($100).
Notisia relevante: Uma Kain 19.839 Iha Ambeno "Hein Ona" Subsidiu
