AMBENO (TOP) – Eis Ministru Saúde, Nelson Martin ne’ebé oras ne’e assume hela kargu Prezidente Forsa Tarefa ba Ekipa Konjuntu Prevensaun Covid-19 iha Rejiaun Administrativu Espesial Oe-Kusi Ambeno atu reorganiza hikas estrutura anterior nian iha rai-ketan ne’e.
Estrutura antes ne’e assume husi eis diretór interinu saúde RAEOA, Marcos Seo, maibé troka tiha on aba Nelson Martin, tanba avaliasaun husi Prezidente Autoridade ba RAEOA katak Seo durante ne’e ladun hatudu serbisu la dun efikas.
Notisia relevante: Lugu Ezonera Diretór Interinu Saúde RAEOA
“Ita hatene oras nee iha situasaun Covid-19, ha’u hanoin ita nia Prezidente Autoridade hasai ona despaisu ida nomeia fali estrutura foun atu kontrola moras surtu. Ha’u mai to’o iha ne’e atu mai ajuda de’it kolega sira iha ne’e atu re-organiza, re-estrutura sira nia ekipa ida ne’e,” hateten Nelson Martin ba The Oe-Kusi Post (TOP) iha Oe-Kusi Ambeno, Segunda 11 Maiu 2020.
Nelson Martin hetan nomeasaun hodi asume kargu ne'e iha fulan Abril liuba.
Notisia relevante: Nelson Martins Xefia Ekipa Covid-19 Iha Amben o
Nia mós agradese ba estrutura tuan ne’ebé konsege rezolve ona serbisu balun durante periodu Estadu dahuluk nian.
“Maibé, ha’u atu dehan katak ekipa ne’ebé mak durante ne’e hala’o serbisu di’ak tebes. Agradese ba estrutura antigu konsege rezolve ameas sira iha faze primeiru,” nia konfesa.
Molok hala’o enkontru ho xefe suku sira husi suku 18, Nelson ho nia ekipa vizita uluk ona área fronteira iha rai-ketan ne’e.
“Ha’u horseik ami ba to’o ona fronteira Naktuka avalia iha ne’eba, no kontinua ohin mós hala’o vizita ba iha sentru saúde sira iha Pasabe no Nitibe nian. Ami desidi ona katak tau pesoal vizilansia iha ne’eba maske situasaun emerjénsia, maibé ita detekta katak iha nafatin movimentasaun liu fronteira, ne’e perigozu tebes ba ita, maibé aban enkontru ami sei halo planu makas liutan ba asaun nian,” Nelson esplika.
