Oekusipost.com Masi – Governu to’o oras ne’e seidauk implementa planu atu fó subsidiu ba sidadaun sira durante periodu Estadu emerjénsia ne’e, maibé autoridade lokal sira iha rai-laran inklui xefe suku Costa, Aleixo Abi iha Rejiaun Administrativu Espesial Oe-Kusi Ambeno (RAEOA) hahu hasai ona karta ida hodi “kobra osan” hamutuk $2.50 ba kada uma kain iha suku ne’e rasik.
Klarifikasaun: Mosu fallansu hakerek xefe suku Costa nia naran Elias Abi ne'e laloos. Tuir loloos mak Aleixo Abi. Ba fallansu ne'e redasaun husu deskulpa no hadia tiha ona.
Bazeia ba karta xefe suku Costa ho númeru referénsia 09/SC/PM/IV/2020 ne’ebé Oe-Kusi Post asesu, katak karta ne’e hasai ona iha loron 17 Abril liu ba bazeia ba sira nia enkontru ne’ebé hala’o iha loron 16 Abril.
Rezultadu husi enkontru ne’e, desidi atu kada formuláriu selu ho valor osan $2.50, maibé utilizasaun osan ne’e tuir karta ne’e katak 0,50 centavos selu ba administrasaun suku, no 0,50 centavos seluk selu ba rental hodi produz fixa familia nian. Karta ne’e asina husi xefe suku Costa no hetan koñesementu husi Jestor Pante Macassar, Eurico da Costa Bobo.
Situasaun ne’e akontese, tanba lideransa komunitáriu ne’e simu orientasaun husi direktór administrasaun Estatal iha RAEOA, José António Martins. Orientasaun ne’e mós la’ós de’it ba suku Costa ne’ebé lokaliza iha Oe-Kusi villa, maibé mós ba suku 17 seluk iha rai-ketan ne’e. Total populasaun iha suku Costa de’it hamutuk 14.350.
“Ami rona orientasaun husi diretór administrasaun estatal, katak sira rona husi media no televizaun katak governu atu fó subsidiu $100 ba kada uma kain. Sira fó orientasaun mai ami atu hala’o lista kada uma kain,” xefe suku Costa, Aleixo Abi hateten ba Oe-Kusi Post iha sede suku Costa iha bairo Masi (Masin), Oe-Kusi Ambeno.
“Tanba ne’e mak iha semana kotuk ami kria enkontru iha sede suku ne’e atu delega xefe bairo no xefe aldeia no konsellu suku sira, hamutuk ho diretór administrasaun Estatal atu deskuti hodi hala’o rejistu kada uma kain kontribui $2.50 centavos, ami prepara formulário ida para priense,” nia afirma.
Iha parte seluk, Diretór Administrasaun Estatal, José António Soares Martins rekoñese nia mak fó duni orientasaun, tanba rasik mós simu orientasaun husi Diresaun Administrasaun Nasionál apoiu suku ne’ebé tutela iha Ministériu Administarsaun Estatal.
“Sim, ha’u mak orienta sira, tanba ha’u simu orientasaun husi Diresaun Administrasaun Nasionál. Ha’u simu orientasaun husi nia depois ha’u hato’o ba xefe suku 18 para hala’o kona-ba lista familia ne’e,” nia rekoñese.
Kona-bá kestaun kobransa osan $2.50, diretór ne’e sita no refere ba diploma Ministerial Númeru 9/2016 katak, fó dalan ba Konsellu Suku mak foti desizaun.
“Baze legal mak ne’e depois ba fó Administrador Sub-distrito asina hotu ona, sira atu kobra hira ne’e halo de’it, tanba baze legal mak ne’e desizaun ne’e Konsellu Suku mak halo,” nia esplika.
Liga ba situasaun ne’e, Xefe Gabinete Prezidente Autoridade (PA) ba RAEOA, Agustinho Caet informa ona ba PA, José Luis Guterres (Lugu), no tuir planu sei bolu xefe suku ho jestor sira atu hapara aktividade ne’e.
“Ha’u rasik simu xamada husi Presidenti Autoridade, tanba ita nia autoridade suku halo kobransa ba komunidade sira, entaun ita husu tuir tanba to’o agora autoridade seidauk iha karta eskrita ka despaisu ida husi governu sentral,” esplika Caet.
Nia hatutan, tanba kestaun ne’e seidauk iha desijaun definitvu, nune’e iha loron rua liuba, autoridade aviza ona autoridade lokal sira iha Ambeno hodi hapara tiha kobransa ne’e.
Maske nune’e, governu antes ne’e aprezenta ona assuntu ne’e iha reuniaun Konsellu Ministru sira iha loron 8 Abril liuba, no ba fali reuniaun Konsellu Ministru sira iha loron Kinta 23 Abril 2020 mós kontinua levanta assuntu ne’e.
Antes ne’e, reuniaun Konsellu Ministru sira iha loron 8 Abril liuba, Ministru Koordenadór ba Assuntu Ekonómiku iha ezersísiu, Fidelis Manuel Leite Magalhães aprezenta proposta kada uma kain sira atu hetan osan $100 durante Estadu emerjénsia.
Notice relevant: COVID-19: Governu Aprezenta Planu Kada Uma Kain Hetan $ 100
Ba fali rezultadu reuniaun Konsellu Ministru extraordinária iha loron 20 foin lalais governu aprova ona, pakote estímulu no resposta ekonómika ida hodi kombate efeitu negativu sira ne’ebé bele mai husi koronavirus ba ekonomia, ne'ebé submete husi Komisaun Interministerial ba Kombate COVID-19. No ba fali rezultadu enkontru Konsellu Ministru sira iha loron Kinta 23 Abril 2020 mós levanta nafatin assuntu osan $100 hodi subsidia sidadaun sira iha rai-laran.
Notisia relevante: Governu Kontinua Promete $100 ba Kada Familia
