GROTU (TOP) – Komunidade 1411 iha suku Grotu, postu Same, munisipiu Manufahi to’o oras ne’e seidauk hetan asesu ba enerjia eletrisidade maske kompania ne’ebé responsavel ba dada projetu ne’e hatun ona rin sira desde tinan 2015.
The Oe-Kusi Post (TOP) observa katak, la’os mosu de’it problema falta enerjia eletrisidade iha suku ne’e, maibé iha mós problema koneksaun lina telemovél.
Kona-ba kestaun ne’e, Xefe Suku Grotu. Filomeno dos Santos hateten, nia ho komunidade sira hare hela rin eletrisidade ne’e fakar hela iha suku laran desde tinan 2015, maibé seidauk halo,
“Ne’ebé atu hato’o ba governu atu oinsa maka rin ida fakar hela ne’e bele halo iha tempu badak. Tanba komunidade kuandu sente buat ida ukun aan ne’e so bee iha, estrada iha, ahi iha”, hateten xefe suku Filomeno ba jornalista sira iha Gruto, Same, Manufahi, Tersa 21 Setembru 2020.
Nia hatutan, ahi eletrisidade ne’e importante tebes ba komunidade sira liliu ba estudante sira hodi bele fasilita sira estuda iha tempu kalan.
Hatan ba preokupasaun ne’e eis Primeiru-Ministru, Kay Rala Xanana Gusmão husu deskulpa ba populasaun Grotu, tanba durante nia ukun la konsege lori eletrisidade tama to’o suku ne’e.
“Ohin xefe suku preokupa ba bee, eletrisidade no buat sira ne’e hotu ami nain rua la halo buat ida, ami mak husu deskulpa tanba ami ka’er ukun la lori eletrisidade mai imi, ami husu deskupa barak,” Xanana hateten.
Iha fatin hanesan Prezidente Autoridade Munisipiu Manufahi, Arante Isac Sarmento katak, governu liu husi Ministériu Obras Públika (MOP) halo ona levantamentu dadus no hatama ona ba sistema Ministériu nian, maibé seidauk iha rezultadu to’o ohin loron.
Foin dadaun ekipa ida mai husi Ministériu Obras Públiku mai hamutuk ho EDTL munisipiu nian haree fila dadus ida ne’e inklui mós suku Grotu, tanba munisipiu Manufahi la’os suku Grotu de’it, maibé iha suku 14 maka seidauk asesu ba eletrisidade,” hateten Arantes.
Nia hatutan, kona-ba besi riin tau ona iha Gruto desde tinan 2015, maibé to’o ohin loron labele realiza tanba nia problema mak laiha kontratu.
“Problema ne’e tanba de’it laiha kontratu, tanba husi maluk veteranu sira mós halo ona levantamentu ba ida ne’e lori ona besi riin mai tau nune’e mak labele hala’o serbisu, nune’e mós emprezariu balun lori besi riin mai hotu, maibé rua ne’e hotu laiha kontratu nune’e hein de’it dezisaun husi Ministériu Obras Puúblikum,” nia esplika.
