MANUFAHI – Prezensa eis Komandante em Chefe das FALINTIL, Kay Rala Xanana Gusmão iha munisipiu Manufahi la’os halo de’it asaun karitativa ba familia kbi’it la’ek sira, maibé vizita mós uma lulik balun ne’ebé eziste iha munisipiu ne’e.
Iha Sesta kalan 10 Jullu 2020, Xanana vizita uma Lisan Asae iha Suku Manutasi, Ainaro. Vizita Xanana nian iha uma lulik ne’e kuaje han oras lubuk ida. Liu tiha ida ne’e bainhira to’o iha munisipiu Manufahi mós Xanana kontinua vizita uma lulik sira no simu bua-malus.
Uma lulik sira ne’ebé Xanana vizita no simu bua-malus iha munisipiu Manufahi mak hanesan iha uma lulik Lusi Cornel (Betano), uma lulik ida iha suku Babulo, ida iha aldeia Turon, no uma lulik Fusu Mauloe ho Boeloko iha foho Kablaki nia hun.
