DILI (TOP) – Ministériu Obras Públikas (MOP) liuhusi Diresaun Jerál Obras Públikas (DGOP) no Unidade Jestaun Projetu (UJP) orienta kompañia CBMI mak provizoriamente halo ona normalizasaun ba ponte Ponte Verukoco ne'ebé kotu (tohar) iha postu administrativu Lautém, munisípiu Lautém inklui parte súl.
Tuir informasaun ne’ebé The Oe-Kusi Post (TOP) asesu iha pájina ofisial Facebook Serbisu Obras Publikas katak, MOP orienta kompañia ne’e, tanba kompañia ne'e mak oras ne’e responsabiliza hela projetu estrada husi Baukau ba Vikéké.
Serbisu normalizasaun ne'e hala'o iha Sesta kalan tomak, 22 Maiu 2020 tomak no Sábadu ohin 23 Maiu kontinua halo serbisu normaliza no garante movimentasaun iha fatin ne’e.
Ponte Verukoco ne'e liga ba postu administrativu Lospalos Villa, tanba ne'e liuhusi normalizasaun ne'e bele ona fasilita movimentasaun komunidade no transporte públiku no privadu iha fatin ne’e.
Hafoin udan-boot no hamosu inundasaun iha Kosta Súl no iha munisípiu Lautém, Ministru Obras Públikas (MOP), Salvador Eugénio Soares dos Reis Pires, orienta kedas Diresaun Jerál Obras Públikas (DGOP) no Intitutu Jestaun Ekipamentus (IGE) hodi halo atendimentu emerjénsia.
Tanba ne'e, ekipamentu pezadu IGE nian oras ne’e destaka iha Kosta Súl hodi halo atendimentu emerjénsia atu normaliza konetividade ba movimentasaun komunidade nian no transporte públiku no privadu sira.
