Oekusipost.com Dili – Sidadaun ida ne’ebé foin livre husi kuarentena obrigatóriu iha Dili durante loron 14, oras ne’e tenke tama fali tan ba kuarentena iha Same, munisipiu Manufahi, tanba detekta mosu sintómas balun.
Reportazen ne’ebé Oe-Kusi Post asesu iha Fan Page Díariu Roman ba Sosiadade ARS ne’ebé bazeadu iha Same villa katak, Manufahi oan hamutuk nain 14 mak durante ne’e kumpri hela konfinamentu (kuarentena) obrigátoriu iha kapital nasaun, no re-integra ona ba sira nia familia iha loron 9 Abril 2020. Entre sidadaun sira ne’e, iha nain ida mak detekta hetan sintómas meár no inus been, no ikus mai tenke tama fali ba kuarentena iha Same iha loron Kinta 16 Abril 2020.
Visé kordenadóra Komisaun téknika COVID-19 munisípiu Manufahi aktuál Diretóra Saúde Munisípiu Manufahi, Florênciana Tilman Corte-Real katak sidadaun ne’e foin mak re-integra ba familia, maibé liu tiha loron (3) médiku sira halo observasaun no detekta hetan sintómas meár ho inus been, no parte saúde kontaktu nia liu husi telefone atu entrega-an hodi kuarentena, maibé la konsege intrega-an, tanba ne’e parte saúde kontaktu direita ho polisia ba to’o iha nia hela fatin mós la konsege hetan, no ikus mai polisia konsege hetan no lori nia mai iha sentru saúde hodi tama fali kuarentena durante loron 7. Nune’e, médiku sira bele halo observasaun ba nia kondisaun saúde.
“Kuandu normál bele re-integra fali ba familia, maibe la iha mudansa médiku sira sei evakua ba Dili hodi halo teste,” esplika diretora Florênciana.
Nia hatutan, ho sidadaun ne’ebé tama hikas kuarentena, iha ona sidadaun na’in 2 maka dadaun ne’e kuarentina hela iha Same. Ida livre husi Dili mak oras ne’e tama fali, no ida seluk nanis iha Manufahi.
Komisaun tékniku COVID-19 Manufahi mós simu tan ona Manufahi oan ida ne’ebé kumpri ona loron 14 iha Dili ho kondisaun saudavé iha loron Kuarta 15 Abril 2020. Manufahi oan hamutuk nain 14 mak oras ne’e fila ba hela hamutuk ona ho sira nia familia.
