Lia-fuan di’ak husi Google ba The Oe-Kusi Post

Foto Espesial.

DILI (TOP) – Sidadaun hotu iha mundu rai-klaran inklui sidadaun sira iha Timor-Leste, no imprensa sira durante ne’e sai preokupadu no pániku tebes hodi luta kontra moras virus corona (Covid-19), anin fresku lori hela lia-fuan di’ak ida husi tasi balun tama to’o redasaun The Oe-Kusi Post iha semana kotuk.

Loos, lia-fuan di’ak ne’e mai husi kuartel jeral Google iha Mountain View, California, Estadus Unidus Amérika liu husi Google News Initiative (GNI) katak The Oe-Kusi Post, www.oekusipost.com liu selesaun iha programa Journalism Emergency Relief Fund (JERF). Programa ne’e ba media lokal sira iha mundu rai-klaran ne’ebé hasoru hela krize pandemia Covid-19.

“Ami hetan sorte di’ak, tanba bele liu iha selesaun ne’ebé rigor tebes. No, agradese tebes ba tulun husi Google News Initiative,” katak xefe redasaun The Oe-Kusi Post, Raimundos Oki.

“I am writing back to let you know we are happy to confirm that your application has been approved to receive USD $5,000 from the JERF,” Recipients & applicatns manager, GNI Innovation Challenges Sarah Hatley katak via email ba The Oe-Kusi Post semana kotuk.

Entretantu, ulun boot Google News Initiative Innovation (GNI), Ludovic Blecher katak aplikante husi media lokal hamutuk 5300 iha mundu mak hetan tulun husi programa JERF hodi bele hakat liu tempu krize ne’ebé kauza husi pandemia Covid-19.

Alista media hamutuk 12.000 husi nasaun 140 mak selesiona husi Googlers (funsionáriu Google). Husi media 5300 ne’ebé liu, barak liu mai husi Amérika Norte hamutuk (media 1800). Europa, Médiu Oriente, no Afrika hamutuk (media1550). Amérika Latina kuaje (media1050). Ásia Pasífiku inklui Timor-Leste hamutuk (media 800). Espesial ba Timor-Leste, iha media ida de’it mak The Oe-Kusi Post, www.oekusipost.com.

Xefe redasaun The Oe-Kusi Post, Raimundos Oki iha Kuartel Jeral Google Ásia Pasífiku, Singapura, Dezembru 2019. Foto media Google.

“Obrigadu barak ba Google ne’ebé fó konfiansa ba www.oekusipost.com. Obrigadu barak mós ba apoiu husi ekipa hotu, familia, maluk, no le’e nain sira hotu. Espera ida ne’e bele sai nu’udar korajen no imune ba ami hodi kontinua hala’o ami nia profisaun iha tempu difisil ida ne’e”.

PUBLISIDADE