DILI (TOP) – Embaixada Estadus Unidus iha Timor-Leste halo doasaun maskara reutilizáveis ba Ministériu Edukasaun iha loron 2 fulan Juñu ne’e, nudar parte ida husi resposta atual ba pandemia COVID-19.
Apoiu ne’e halao iha tempu ne’ebé Ministériu Edukasaun prepara hela labarik sira atu fila ba eskola. Doasaun ne’e sei benefisia estudante rihun resin no promove ambiente aprendijazen ne’ebé saudavel no siguru. Maskara reutilizáveis ne’e entrega husi Embaixadora EUA Kathleen Fitzpatrick no Xefe Gabinete Kooperasaun Defeza Pablo Valerín ba Ministra Edukasaun, Juventude no Desportu Dulce Soares.
“Ami apoia governu Timor-Leste liu husi investimentu ba foin sae Timor oan sira,” hateten Embaixadora Estadu Unidus Amerika (EUA) Kathleen Fitzpatrick liu husi komunidade imprensa ne’ebé The Oekusi Post (TOP) asesu, Tersa 02 Juñu 2020.
“Maskara sira ne’e sei garante estudante sira siguru fila ba eskola no iha nu’udar forma protesaun adisional ida hasoru COVID-19 no prevene moras seluk mos.”
Projetu Embaixada EUA nian ne’e, fornese finansiamentu ba feto liu rua nulu ne’ebé ekonomikamente marjinalizada hodi produz maskara sira ne’e durante fulan rua. Projetu ne’e nia objetivu mak prevene propagasaun moras infesioza sira, oferese oportunidade ekonómika, no reduz lixu ospitalar. Projetu ne’e mos apoia estratejia bo’ot Embaixada EUA nian hodi oferese oportunidade ekonómika ba traballador lokal sira no oferese solusaun sustentavel.
Projetu ne’e finansia husi Estadus Unidus nia Komando Militar iha Indo-Pasífiku ne’ebé iha komitmentu bo’ot atu apoiu luta hasoru COVID-19 iha rejiaun ne’e. Iha mo’os projetu seluk mak fornesimentu estasaun fase liman. Projetu ne’e parte ida husi orsamentu millaun $1.6 ne’ebé alokadu ba apoia governu Timor-Leste hodi luta kontra COVID-19.
Iha Timor-Leste, Estadus Unidus investe ona millaun besik $70 ba asistensia saude no EUA oferese ona millaun liu $542 ba nasaun ne’e durante tinan 20 nia laran.
