DILI ( TOP) - Prezidente Komisaun A, deputadu Joaquim dos Santos hateten komisaun halo apresiasaun atu halo audiénsia ba munisípiu sira kona-ba lei podér lokál.
"Ami halo apresiasaun ba lei podér lokál ne’e sei hahú husi Bobonaru, uluk ami ba tiha ona Suai, maibé projetu-lei ne’e, ami mós hein hela governu atu prepara ninia proposta kona-ba finansiamentu podér lokál,” dehan Joaquim dos Santos, ba jornalista sira, iha Parlamentu Nasionál, Dili, Kuarta 21Outubru 2020.
Nia argumenta, proposta lei Orsamentu Jeral Estadu 2021 aprova ona husi Parlamentu Nasionál, komisaun A prepara ona kondisaun hodi diskuti no aprova pakote projetu lei podér lokál, eleisaun podér lokál no Finansas Podér lokál.
“Ita rona malu, iha konsesu ha’u hanoin 2021 nia laran ita bele rezolve problema ida-ne’e para munisípiu sira ne’ebé iha ona kondisaun bele ona eleisaun ba sira-nia Prezidente Lokál, ita planu hela ida-ne’e ba iha 2021 nian. Maibé seidauk halo kalendáriu,” nia fundamenta.
Nia akresenta, agora dadaun kontinuasaun deit iha Prezidente sesante Deputada Carmelita Caetano Moniz nian ne’ebé primeiru audiénsia ona iha Suai, agora komisaun planu hela atu halo 13 audiénsia hahú husi Suai, Bobonaru depois ikus mak Dili karik.
“Ami-nia audiénsia hotu mak ami formula hodi deside ho pareser ida molok haruka ba Parlamentu nasionál, maibé ami sei rona tán sosiedade sivil no entidades sira ne’ebé iha relasaun ho lei-ne’e,” nia hateten.
Tuir nia, Planu komisaun nian sei halo iha fulan-janeiru diskusaun seriu, tanba agora orsamenru sei interope, maibé komisaun buka tempu uitaun-uitaun hodi prosesu lei.
“Lei podér lokál hanesan projetu lei, tanba uluk Prezidente Repúblika veta tiha ona depois kaduka, depois deputadu grupu ida foti no reformula fali aprezenta hanesan projetu-lei,” nia afirma.
