DILI (TOP) – Universidade Paz (UNPAZ) durante ne’e hasoru hela laloran boot ho akontesimentu joven ida mate iha área universidade ne’e nia laran, no mosu tan sona malu. La’os ho akontesimentu hirak ne’e mak sai sasukat ba UNPAZ hodi preokupa ba situasaun paz no estabilidade iha rai-laran, maibé violasaun ba konstituisaun mak sai nu’udar preokupasaun boot.
Nune’e, UNPAZ hamutuk ho Komisaun Justisa, Paz Integridade ba Kriasaun hala’o seminariu loron ida ne’ebé involve orador nain haat (4) ho tema “Movimentu Patriotizmu Konstitusional: Konsiensia Kritika ba Nasaun”.
Hafoin semináriu ne’e, Reitor UNPAZ, Adolmando Amaral hateten, semináriu ne’e atu lori ema hotu nia hanoin, tanba tuir nia katak situasaun real ne'ebé oras ne’e akontese iha rai-laran, la’o tatidik malu hela, hanoin lahanesan. Ema balun hanoin ba leten, no ema balun hanoin ba karaik fali.
"Hahalok sira hanesan ne'e, ita labele kontinua hodi dada ba naruk, tanba ita nia hanoin agora ne'e, ema balun hanoin ba leten, no ema balun nia hanoin sei ba karaik, no iha parte seluk mós ema balun ba loos, balun ba karuk, ko'alia mak tuir ita nia gostu de'it. Ita sira ne'ebé mak kontinuador, tenke la'o tuir ita nia konstituisaun haruka, tanba ita haree ba lei ne'ebé vigora iha rai-laran, agora la vale,” hateten Reitor UNPAZ ne’e ba jornalista sira iha kampus UNPAZ, Manleuana, Dili, Sábadu 8 Agostu 2020.
Nia hatutan, hun no abut husi semináriu ne’e ida de’it mak atu lori ema hotu hanoin tuir dalan loos nian, hanoin tuir lei inan haruka, tanba tuir nia katak luta naruk durante tinan 24 nia laran hodi rezultadu ema 200.000 resin mak mate husi tinan 1975 to’o 1999, tanba buka lia loos.
“Halo semináriu atu loke ita nia hanoin hodi ko’alia tuir de’it buat ne’ebé mak loos,” nia afirma.
Iha fatin hanesan, orador padre Martinho Gusmão durante nia intervensaun iha semináriu ne’e katak, sitausaun tina ida ne'e, hamosu konfuzaun oioin, tanba ema hotu kritiku ba saida mak ukun na'in sira halo la tuir ema hotu nia hakarak.
"Movimentu ida ne'e mosu husi padre foin sa'e sira mak ami bolu malu tuur hamutuk hodi ko'alia kona-ba movimentu konsiensia nian hodi hamate hanoin ne'ebé ema balun sei uja la tuir dalan legal,” nia esplika.
Partisipante sira iha semináriu mai husi estudante UNPAZ rasik, UNTL, no ICR.
