DILI (TOP) — Ministra Saúde (MS) Odete Maria Freitas Belo hateten, to’o ohin loron seidauk rona no hatene kona-ba nia Diresaun Nasionál Rekursu Humanu ne’ebé desidi boikota bolseiru Ministériu Saúde hamutuk 300 atu labele hala’o sira estajiu profisional iha fasilidade saúde sira iha rai-laran.
Notisia relevante: Ministériu saúde boikota nia bolseiru rasik
“Ha’u ba buka tiha informasaun tanba ha’u seidauk hatene informasaun ho lolos para ha’u bele ko’alia kona asuntu ida ne’e,” Ministra Odete hateten ba Jornalista sira iha Palásiu Governu, Dili, Kuarta 27 Janeiru 2021.
Iha parte seluk, Prezidente Partidu Demokrátiku (PD) António da Conceição “Kalohan” husu ba MS atu halo esplikasaun klean kona-ba saida maka impede fali bolseiru sira ne’e hodi labele hala’o sira nia estajiu profisional ba fasildiade saúde sira iha rai-laran.
“Ha’u hanoin FDCH projetu ba governu, projetu ba ita hotu ne’ebé sei bele karik, señora ministra tau matan hela bá! Buka hatene tok, impedimentu saida maka hodi halo estudante finalista sira ne’e labele halo sira nia pratika iha sentru saúde sira,” Kalohan levanta assuntu ne’e durante sesaun plenaria Parlamentu Nasionál Tersa 26 Janeiru 2021.
Bolseiru timoroan kuaje nain 300 resin husi Ministériu Saúde ne’ebé finansia husi Fundo de Desenvolvimento do Capital Humano (FDCH) hodi ba hasai estudu iha área saúde nian tantu iha universidade sira iha rai-laran, no rai-liur oras ne’e labele hala’o sira nia atividade estajiu profisional saúde iha fasilidade saúde sira iha teritóriu nasionál, tanba mosu desijaun boikota husi Direisaun Nasionál Rekursu Humanus (DNRH) Ministériu Saúde (MS) nian ho rajaun seidauk iha koñesementu husi MS rasik maske instituisaun rua ne’e nu’udar instituisaun Estadu hotu.
Tuir informasaun ne’ebé The Oe-Kusi Post asesu iha Pájina Ofisial Facebook FDCH nian katak, instituisaun Estadu ne’e ofisialmente entrega bolseiru Timoroan sira hamutuk nain 39 ne’ebé remata ona sira nia estudu iha área siensia saúde husi universidade sira iha rai-laran hodi ba hala’o estajiu profisional durante fulan 6 iha Sentru Saúde Komunitária Comoro iha loron 12 Janeiru 2021, no bolseiru sira ne’e simu direita husi Xefe Sentru Saúde Komunitária Comoro Emilia Ayati de Sousa.
Iha Hospital Baukau nian mós hetan estajiariu nain 9, no seluk tan.
Dadus husi FDCH nian katak, total distribuisaun bolseiru sira iha faze primeiru hamutuk ema nain 152 ne’ebé koloka tiha ona iha sentru saúde hotu iha teritóriu nasionál, no atu aloka tan balun iha faze daruak nian hodi bele hamutuk 300 resin.
Tuir karta desijaun ida husi Sentru Saúde Komunitária (SSK) Becora ho númeru referensia 05/SSK Becora/Admin/1/2021 katak, bazeia ba orientasaun husi Diresaun Nasionál Rekursu Humanu (DNRH) Ministériu Saúde (MS) no Serbisu Saúde Munisipiu Dili (SSM-Dili) labele akomoda estajiariu profisional saúde ne’ebé hetan subsidiu husi FDCH, tanba lahetan koñesementu husi Ministériu Saúde no Serbisu Saúde Munisipiu Dili.
“Ho rajaun hirak ne’e maka ami entrega fila-fali estajiariu profisional saúde hirak ne’ebé koloka mai SSK Becora iha dia 11 de Janeiro de 2021 ba FDCH. Husu atu FDCH halo koordenasaun ne’ebé di’ak liu ho Ministériu Saúde ho SSM-Dili,” konteudu karta SSK Becora ne’ebé TOP asesu foin lalais.
Tuir mensajen via telemovél (Short Service Message) husi Diretora Nasionál Rekursu Humanu Ministériu Saúde, Tomasia de Sousa katak kolokasaun estajiariu profisional saúde sir aba fasilidade saúde sira iha rai-laran kontra tebes politika Ministériu Saúde nian.
“Hare ba kontratu estajiu profisionais ne’ebé maka hetan mós asina husi Xefe no Diretor Saúde sira, ne’e kontra tebes politika MdS nian,” esplika direitora Tomasia liu husi nia mensajen badak ne’ebé TOP asesu.
