PLP kestiona aan rasik

DILI (TOP) – Maske bankada Partidu Libertasaun Popular (PLP) oras ne’e nu’udar nain ba governu atual ne’ebé tonka tan (viabiliza) husi partidu FRETILIN, maibé PLP kontinua kestiona maka’as planu governu ne’ebé presija osan hamutuku millaun $41.588 husi Fundu Infraestrutura hodi sosa de’it ekipamentu komputadór iha proposta-lei Orsamentu Jerál (OJE) tinan fiskál 2021.

Deputada Maria Angelina Lopes Sarmento husi bankada PLP katak, durante hala’o kontaktu eleitorál iha baze, povu nia nesesidade prioritáriu liu mak água no saneamentu maibé iha área refere governu tau de’it millaun $3.449.

“Maibé iha livru panorama orsamentál prevee kedas millaun $41.588 hodi kompra ekipamentu komputadór, durante ami halo kontaktu eleitorál povu nia nesesidade liu mak água no saneamentu,” deputada Maria Angelina kestiona assuntu ne’e iha sesaun plenária iha ámbitu audiénsia públika ho Ministériu Obra Públika (MOP), Ministériu Planeamentu no Ordenamentu (MOP) no Ministériu Transporte no Komunikasaun (MTK), iha Parlamentu Nasionál, Kuarta 11 Novembru 2020.

Deputada Maria Angelina Sarmento

Governu prevee Fundu Infraestrutura (FI) ba tinan fiskál 2021 ho montante millaun $339.605 ne’e kompostu hosi rihun $32 ba saláriu vensimentu, millaun $1.040 ba bens (sasán) servisu no millaun $338.533 ba kapitál dezenvolvimentu.

Hosi Fundu Infraestrutura ne’e mós prevé rihun $60 ba boa governasaun no jestaun institusionál, setór agrikultura millaun $ 3.798, água no saneamentu millaun $3.449 de’it, dezenvolvimentu urbanu no rurál millaun $ 6.190, edifísiu públiku millaun $7.693, edifísiu edukasaun millaun $4.843, enérjia elétrika millaun $18.321.

Deputada PLP ne’e kestiona tanba VIII Governu prevee millaun $41.588 atu kompra ekipamentu komputadór. Iha Fundu Infraestrurura ne’e mós prevee millaun $4.844 iha saúde, seguransa no defeza millaun $13.884.

Nia husu ba Prezidente Konsellu Administrasaun Fundu Infraestrutura (KAFI) no Vise-Primeiru Ministru, José Reis atu argumenta razaun ne’ebé halo governu prioritiza liu sosa ekipamentu komputadór iha OJE 2021.

Hosi fundu infraestrutra ne’e mós prevee ba solidariedade sosiál millaun $1.000, projetu tasi mane millaun $8.500, aeroportu millaun $19.843, preparasaun dezeñu no supervizaun ba projetu foun millaun $9.441, estrada millaun $105.215, ponte millaun $4.896, portu millaun $1.814, programa ba setór turizmu rihun $ 652, programa empréstimu millaun $70.700, programa setór finansa millaun $2.905, Sekretariadu Estadu Juventude no Desportu millaun $2.034, Komisaun Administrasaun Fundo Infraestrutura (KAFI) millaun $1.011, programa manutensaun no reabilitasaun millaun $6.924.

Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.

Jornalista