DILI (TOP) – Relatóriu fulan tolu (Marsu-Maiu) nian husi Banku Sentral Timor-Leste hatudu, total osan petróliferu (osan mina no gás) ne’ebé produz husi mina matan Bayu Undang oras ne’e rekopera fali ona ba billiaun $ 17.8 hafoin monu toko $ 844 iha fulan tolu uluk nian.
Vise governadór Banku Sentra Timor Leste (BCTL) Venancio Maria Alves katak, maske iha trimestre dahuluk tinan 2020 nian Fundu Petrolífeiru monu tokon $844, maibé hetan rekoperasaun hahú husi fulan Marsu 2020.
“Fundu Petrolífeiru iha trimestre dahuluk ninia valór ne’e monu tokon $844, depois de trimestre primeiru, hahú husi fulan Marsu mai komesa rekopera fila fali ona, agora iha Maiu ne’e total balance fundu petrilífeiru nian, ami publika tiha ona iha website BCTL nian hamutuk Billiaun $17.8, entaun valór negativu husi tokon $844 ne’e ita rekopera fali ona sorin,” hateten Vise Governadór BCTL Venancio Maria Alves ba jornalista sira iha Ministériu Finansas Aitarak Laran Dili, Tersa 14 Jullu 2020.
Nia hatutan, rekoperasaun ba valór ne’ebé monu ne’e, kontribui husi merkadu asoens sira.
“Rekoperasaun ida ne’e, kontribuis husi merkadu asoens, tanba MSI I World ita adopta, entaun nia sa’e fali mais de pursentu 7%, maibé sa’e ida ne’e, previzaun merkadu internal sei iha teritóriu negativu katak, seidauk rekopera totál. Entaun bola atividade merkadoria ne’e sei kontinua, tanba Covid ne’e rasik mak sei kontinua,” nia afirma.
Vise governadór ne’e mós dehan, impaktu ba valór FP monu, tanba Covid inklui nasaun hotu lockdown.
“Impaktu ba valór FP monu, tanba Covid inklui nasaun hotu lockdown, entaun atividade ekonómiku ladun la’o di’ak, para demanda ba sasan sira ne’ebé bolu international demand and splay change ne’e xumba tiha, entaun atividade ekonomia mundiál ne’e ladun la’o ho di’ak entaun impaktu merkadu internasional monu. Maibé ita-nia osan FP iha Billiaun $17.8 iha fim maiu 2020,” Venancio dehan.
