Oekusipost.com Dili – Reuniaun Konsellu Ministru extraordinariu desidi ona atu selu osan ho montante husi $5 to’o $25 ba ajente Estadu sira ne’ebé mak durante ne’e serbisu ba moras virus corona (COVID-19) iha liña dahuluk nian (fronline).
Assuntu ne’e aprezenta husi Ministra Finansas interina, Sara Lobo iha reuniaun Konsellu Ministru ne’ebé hala’o iha Auditóriu Kay Rala Xanana Gusmão iha edifisiu Ministériu Finansas hodi ikus mai aprova ona liu husi Dekretu Lei Númeru 17/2020 kona-bá atu selu ajente funsionariu sira, ajente traballador sira iha administrasaun públika ne’ebé presta ona sira nia atividade iha serbisu no kontrolu ka prevensaun COVID-19, durante Estadu emerjénsia.
Desijaun ne’e mós katak, suplementu remuneratóriu ne’e entre $5 to’o $25 lorloron ba traballador efetivu sira durante Estadu emerjénsia bazeia ba nia grau risku sira. Montante hirak ne’e sei sura hahu husi loron 28 Marsu to’o Estadu emerjénsia ne’e hotu. No prosesu pagamentu mós sei halo husi kada ministériu sira.
Ministra Finansas Interina Sara Lobo Brites hateten, rezolusaun ne’e fixa ninia montante nune’e mós períodu aplikasaun, tanba rezolusaun ne’e produz efeitu hahú husi 28 fulan Marsu bainhira corona virus mosu profisionál saúde sira hahú servisu. No ninia durasaun depende ba finalidade Covid-19 rasik.
Ministra ne’e esplika, mekanizmu pagamentu sei hein ministériu sira sei aprezenta lista funsionáriu sira-nia naran no mós montante ne’ebé atribui depende ba lista prezensa. No presiza hetan sertifikadu husi sala situasaun sentru integradu jestaun krize.
Tanba ne’e, nia hatutan, primeiru ministru Taur Matan Ruak, husu membru governu responsavel sira hanesan Ministériu Saúde no Ministériu Defeza no Seguransa para iha sertifikadu husi sala situasaun hodi atribui montante ba ema ne’ebé mak envolve duni iha prosesu prevensaun kombate Covid-19.
Nia hatutan, se la’e bele kria injustisa tanba ema ne’ebé la diretamente envolve iha kombate Covid-19, maibé simu sumplementu hanesan ema ne’ebé husik hela sira-nia família hodi dedika ninia tempu ba knaar todan ne’e.
Sara Lobo hateten, ko’alia kona-ba subsídiu renumeratoriu ninia montante fixa tuir kategoria ne’ebé aprezenta husi ministériu saúde no ministru defeza no seguransa inklui ministériu sira seluk.
“Ita fixa montante $ 25 lorloron tuir kontaktu direita iha fatin izolamentu no laboratóriu tanba sira mak kontaktu direita ho pasiente Covid-19 nian,” nia esplika ba jornalista sira iha edifisiu Ministériu Finansas iha Ai-Tarak Laran-Dili, Tersa 5 Maio 2020.
Nia hatutan, suplementu renumeratoriu ne’e kada fulan funsionáriu públiku hotu manan ninia saláriu maibé renumeratoriu ne’e desizaun governu nian para rekoñese profisionais sira.
Sara Lobo esplika, serbisu kuarentena fixa montante subsídiu dolar ruanulu ($20) no dolar sanulu resin lima ($15) ba sira ne’ebé servisu administrativa. Kategoria tolu ne’e ba de’it ministériu saúde.
Nune’e mós nia konta, parte seguransa hanesan F-FDTL, PNTL Imigrasaun, Kuarentena, Motorista, Alfandega ne’ebé servisu iha fronteira terestre, portu no aeroportu loron ida hetan $ 15. Tuir tan, pesoál água no saneamentu, eletrisidade, seguransa protesaun sivíl, traballadór rekolla lixu kada loron dolar lima ($5).
Agora ema sira ne’ebé mak hetan depende ba ministériu ida-idak sira mak identifika sira-nia ema no lista prezensa.
