DILI (TOP)— Deputadu FRETILIN Alexandrino Cardoso Da Cruz preokupa ba desijaun Ministériu Edukasaun Juventude no Desportu ne’ebé loke hikas ona atividade eskola iha rai-laran, maibé estudante sira laiha maskara hodi bele uza tuir protokolu Organizasaun Mudiál Saúde nian.
“Se bele governu liuhusi Ministériu Edukasaun Juventude no Desportu maskara ba estudante sira, tanba estudante sira ba eskola maskra laiha oinsa. Atu sosa, kuitadu ita hatene katak sira nia ekonomia ne’e susar tebes,” deputadu Alexandrino levanta assuntu ne’e liu husi sesaun plenaria Parlamentu Nasionál, Tersa 19 Janeiru 2020.
Nia hatutan, la’os de’it menus maskara ba estudante sira, maibé bee-moos de’it mós laiha.
“Ita atu kumpri nafatin protokolu Organizasaun Saúde Mudiál para bele halo prevensaun ba pandemia Covid-19 oinsa? Ha’u hakarak husu Ministru Edukasaun bele haree no tetu didiak bainhira ita atu ativa fali eskola sira ne’e, liu-liu eskola sira iha fronteira,” nia hateten.
Nia dehan, tanba eskola ne’ebé maka besik fronterira ema la’o ain de’it mós la to’o minutu 40 to’o eskola. Tanba ida ne’e kazu transmisaun lokal sa’e maka’as ona iha ne’ebá tanba ne’e maka komunidade sira hela besik fronteria ne’e eskola mós besik hela komunidade sira tauk loos.
Assuntu hanesan mós hato’o husi deputada bankada KHUNTO Irene Gonzaga katak, Ministériu Edukasaun ho Saúde tenke serbisu hamutuk hodi rezolve sitasaun ne’e, tanba tuir nia katak antes ne’e nia hetan estudante balun ne’ebé la tama tuir prosesu aprendizajen iha aula laran, tanba de’it maskara laiha.
“Ha’u husu nusa maak imi ohin la ba eskola, estudante sira hatan katak ami fila-fali tanba mestre sira la hatan ami tama ba aula hodi aprende tanba ami maskra laiha,” esplika deputada Irene.
Governu hamamar ona regra sira, maibé ezije sidadaun sira tenke uja maskara nafatin hodi prevene aan husi moras Covid-19.
Entretantu, antes ne’e embaixada Estadus Unidus Amérika iha Timor-Leste iha Juñu 2020 oferese oportunidade serbisu ba Timor oan ho finansiamentu hodi produz maskara reutilizável hamutuk 15,000 ne’ebé halo husi inan feton Timor oan sira no distribui husi Ministériu Edukasaun ba eskola sira.
“Ami apoia governu Timor-Leste liu husi investimentu ba foin sae sira. Maskara sira ne’e sei garante estudante sira siguru fila ba eskola no nu’udar forma protesaun adisional ida hasoru COVID-19 no prevene moras seluk mos,” Embaixadora EUA Kathleen Fitzpatrick.
