AMBENO (TOP) – Primeiru-Ministru atual Prezidente Partidu Libertasaun Popular (PLP), Taur Matan Ruak ohin la’os hasoru de’it komunidade baibain sira, maibé hasoru mós “buan” ida iha Oe-Kusi Ambeno.
Povu Oe-Kusi Ambeno kuaje rihun 20 resin seidauk haluhan kona-ba deklarasaun portavoz ba Aliansa Mudansa ba Progressu (AMP) atual Primeiru-Ministru, Taur Matan Ruak iha kampu futebol Oe-Bau iha tinan 2018 katak, bainhira AMP manan eleisaun, nia sei duni sai Prezidente Autoridade ba Rejiaun Administrativu Espesial Oe-Kusi Ambeno (RAEOA), Mari Bin Amude Alkatiri ho Oe-Kusi oan ida nia koñese nu’udar “buan” ida maka Arsenio Paixão Bano.
Maibé, iha loron Sesta, 12 Juñu 2020, PM Taur fó hikas tomada pose ba Arsenio Bano hodi troka José Luis Guterres.
Jeneral Taur Matan Ruak nia promesa sira desde tinan 2017 no 2018 kuaje hanesan de’it katak bainhira manan eleisaun no hetan poder iha governu sei hasai tiha Mari Alkatiri no Arsenio Bano husi Oe-Kusi Ambeno. Faktu hatudu, ema nain rua ne’e sira mandatu mak remata, la’os hasai.
Atu kumpre nia kompromisu politika sira entre 2017 no 2018, iha loron 13 Novembru 2019, nia fó posse ba José Luis Guterres ‘Lugu’ hodi assume kargu Prezidente Autoridade ba RAEOA-ZEESM.
Lugu asume kargu ne’e iha loos situasaun difisil. Estadu iha hela situasaun emerjensia, tanba moras surtu Covid-19 iha Timor-Leste. Hafoin liu tiha kuaje fulan 7, tanba mudansa politika iha nasionál (politiza viabiliza) ikus mai ezonera tiha Lugu iha loron Kuarta 10 Juñu 2020.
Durante kampaña eleitoral ba eleisaun antisipada, eis protavos AMP, Taur Matan Ruak hakilar no promete ba povu Oe-Kusi Ambeno iha kampu futebol Oe-Bau, katak, bainhira AMP manan eleisaun, sei hasai Mari Alkatiri no Arsenio Bano husi Oe-Kusi Ambeno, realidade laiha. Promesa ne’e bosok de’it, tanba Alkatiri ho Bano sira nia mandatu mak remata to’o tinan lima (5), laiha ema ida mak hasai sira husi Oe-Kusi Ambeno.
“Ha’u iha mehi ida, imi hatene ha’u nia mehi mak saida. Tinan kotuk, ha’u hamrik iha ne’eba, ha’u ko’alia saida. Ha’u hakarak Mari Alkatiri sai husi Oe-Kusi. Tanba nia halo terus liu ona imi. Ha’u moe fali, Ha’u uluk Prezidente mai vizita suku hotu-hotu. Imi balun hakuak ha’u tanis dehan maun, Mari hare ami la di’ak. Maibé, imi fila kotuk ha’u mai hatete ba imi fó kadeira 8 de’it kasian,” hateten eis portavoz AMP atual Primeiru-Ministru Taur Matan Ruak durante kampaña ba eleisaun antisipada iha kampu futebol Oe-Bau, Oe-Kusi Ambeno iha loron 30 Abril tinan 2018.