DILI (TOP) — Ais Tasi (Marcos Caet) ne’ebé halai Lakon iha loron 26 Dezembru 2020 iha Lakluta, Vikéké hetan fali ona iha suku Kairui, postu Laleia, munisipiu Manatuto iha loron 1 janeiru 2021.
Notisia relevante: Ais Tasi lakon semana ida ona iha Lakluta
Anita Sipa husi postu Pasabe, Oe-Kusi Ambeno ne’ebé hola mane husi aldeia Beabai, suku Kairui, postu Laleia konta, sira hetan fali Ais Tasi iha Kairui iha loron 1 Janeiru 2021.
Nia hatutan, bainhira mosu iha Kairui, ema barak maka hasoru nia no husu nia husi ne’ebé, no atu ba fali ne’ebé.
“Ha’u hetan nia ne’e, iha dia 01 de janeiru, ha’u husu ba nia dehan nia mai husi Vikéké lakluta,” hateten Anita Sipa via kontaktu telemovél ba The Oe-Kusi Post (TOP), Domingu 03 Janeiru 2021.
“Ha’u la hatene ida kolega balun tur iha liur mak nia mai hasoru sira atu husu ajuda depois mak kolega sira husu ba nia katak ita husi ne’ebé? Hanesan ne’e, nia hatan la hatene, lakleur nia hatan katak husi Dili atu ba Manatuto, dehan tan husi L akluta atu ba Dili, no ikus liu hatan katak ha’u husi ha’u nia oan feto hola mane iha Vikéké, Lakluta atu ba Dili,” feto foun Kairui ne’e konta.
Sipa husu ba Ais Tasi atu lalika halai tan, no hanoin barak, tanba familia sira iha Dili sei hasoru nia.
“Ami haree nia telefone mate ami charge tiha, hasai tiha nia sim card tau fali ba ami nia telefone ami telefone ba nia familia sira,” Sipa konta.
Iha parte seluk familia Ais Tasi, Maria Bobo hateten, sira hetan ona Ais Tasi iha Kairui-Manatuto liu husi tulun Anita Sipa nu’udar feto foun Kairui nian.
“Horbainrua kalan haruka motor haat sai husi Dili ba foti iha aldeia Beabai suku Kairui. Horsehik lorokraik maka mai to’o Bebonuk Dili,” esplika Bobo.
Entretantu, Ais Tasi konta lahatene kona-ba motive halai ne’e, maibé foin sente hakfodak bainhira halai to’o foho ida nia tutun iha Lakluta, Vikéké. No durante semana ida tenta buka dalan atu fila Lakluta, maibé lahatene dalan. No prosesu la’o sai husi Lakluta to’o mosu fali iha Kairui, tanba hare de’it ema sunu petasan.
Oras ne’e Ais Tasi iha ona nia familia sira iha Bebonuk, Dili no hein de’it ro atu fila ba aldeia Hoineno, suku Bobometo, postu Oe-Silo, Oe-Kusi Ambeno.
