HATUSAU (TOP) – Komandante em Chefe das FALINTIL, Kay Rala Xanana Gusmão mata-been monu hafoin simu bensaun husi Padre Frido Abel Quintão ho sarani lubun iha Gruta Ave Maria Lebulau, Maubise.
Xanana vizita aldeia Hatusau, suku Hohorai Ki’ik, postu administrativu Maubise, munisipiu Ainaro iha loron loron Sesta 05 Novembru 2021 hodi apoia ai-han ba sidadaun vulnerável balun iha suku.
Komunidade sira simu eis Primeiru-Ministru ne’e ho laran ksolok wain tebes basa tuir sira katak durante tinan barak nia laran hetan de’it nia imajen iha media (TV), no rona de’it nia lian iha radio, maibé ohin loron fizikamente bele hare ho matan-rasik no bele ka’er ho liman.
Durante omilia, padre selebrante iha misa ne’e, Frido Abel Quintão konsidera asaun karitativa ne’ebé Xanana hala’o desde tinan kotuk to’o ohin loron nu’udar asaun umanizmu ne’ebé ema hotu presija halo tuir, tanba asaun hirak ne’e la’o tuir de’it Na’i Jesus Cristo Nia ain-fatin.
“Avo nia prezensa justifika domin boot mai ami, tanba ne’e ita agradese ba domin ne’e. Maromak hatudu ona, Maromak fó ona mai ita domin. Ita hotu-hotu tenki hamutuk ho Avo Nana sai instrumentu ida de’it ba domin Maromak nian, la’o fila-fali hodi dezenvolve ita nia nasaun,” hatete Padre Frido iha nia omilia iha Gruta Ave Maria Leubulau iha aldeia Hatusau, suku Hohorai Ki’ik, postu administrativu Maubise, munisipiu Ainaro, Sesta 05 Novembru 2021.
Padre husi kongregasaun Kanossiana ne’e hatutan, Xanana maka lider ida domin-nain tanba nunka sente kolen hodi la’o buka tuir nia povu maske la’o iha loron-laran, sa’e-foho, tun-foho no hakur mota.
Padre Frido dehan, Timoroan oan tomak tenki orgullu ho líder boot hanesan Kay Rala Xanana Gusmão ne’ebé nunka sente kolen luta ba povu nia prosperu desde kedas lori rai ne’e ba hetan naroman nune’e ohin loron ita hotu mai hamrik hodi hasa’e agradese. Ba esforsu ne’ebé oferese ba rai ne’e, antes hakotu, Padre Frido husu ba srani sira hotu foti liman tula iha Kay Rala Xanana Gusmão nia ulun nu’udar sinal hodi husu salvasaun atu Na’i Maromak kontinua haraik vida naruk nune’e dezenvolve rai ne’e.
Bainhira sarani sira foti liman akompaña husi bensaun husi Padre Frido, Xanana Gusmão mós la augenta hodi hasai kedas matan-been nu’udar sinal foun simu responsabilidade ba kontinuasaun serbisu ba povu no nasaun.
Kay Xanana Gusmão agradese ba sarani sira hotu inklui Padre Frido ne’ebé fó biban selebra misa ida ba nia maske konsidera nia prezensa lori de’it ai-han ituan ba komunidade sira.
Hare ba Xanana nia matan-been monu, Padre Frido mós hakbesik-aan ba hakuak hodi fó solidariedade no husu atu forsa nafatin nune’e bele tau matan ba povu no nasaun.
Remata misa kontinua kedas ho asaun karitativa ba sidadaun vulnerável sira ne’ebé intrega simbolikamente husi Kay Rala Xanana Gusmão ho amo Frido.
